Monday, September 16அரியவை அறிந்திட, தெரிந்தவை தெளிந்திட

பாவாடை தாவணியின் நவீன வடிவங்களும் – இன்றைய பெண்களும்

பாவாடை தாவணியின் நவீன வடிவங்களும் – இன்றைய பெண்களும்

பெண்களுக்கு இந்திய உடைகள் ஆயிரம் ஆயிரம் இருந்தாலும் அந்த உடைகளில் குறிப்பாக தென்னிந்திய உடைகளில் மிகவும் ரசித்து அணிந்து கொள்ளும் ஆடை என்று பாவாடைத் தாவணியைக் கூறலாம். பாவாடை தாவணிக்கு என்று தனித்துவமும் பெண்களிடையே வரவேற்பும் எப்போது இருந்து கொண்டே இருக்கிறது.

நம்முடைய அம்மா காலத்தில் எல்லாம் பூப்படைந்த பிறகு திருமணமாகும் வரை பெண்கள் அணிந்த ஆடை என்றால் அது பாவாடைத் தாவணிதான். காலங்கள் மாற மாற பாவாடைத் தாவணி என்பது கல்யாணம், வரவேற்பு, கோவில் நிகழ்ச்சிகளுக்கு அணிந்து கொள்ளும் ஆடையாக மாறியது. இப்பொழுது சிறு குழந்தைகளுக்குக் கூட பாவாடைத் தாவணி அணிவித்து நிகழ்ச்சிகளுக்கு அழைத்து வருவது ஒரு ஃபேஷனாக மாறிவிட்டது.

இளம்பெண்கள் இந்த பாவாடைத் தாவணியில் அழகுதான். அதிலும் பட்டுப் பாவாடைத் தாவணியில் என்றால் கேட்கவா வேண்டும்.

பாவாடைகளில் சிறிய ஜரிகை பார்டர், கையகல ஜரிகை பார்டர், ஒரு முழ ஜரிகை பார்டர் என்று இருந்தால் தாவணியில் ஜரிகைக் கரையும் அளவுகளில் மாறுபடும். சில பட்டுப் பாவாடைகளில் ஜரிகை பார்டர்கள் மட்டும் இருக்கும் மற்ற இடங்கள் பிளெயினாக இருக்கும். இன்னும் சிலவற்றில் ஜரிகை கட்டங்கள், புட்டாக்கள், யானை, குதிரை, அன்னப்பட்சி டிசைன்கள் பட்டு நூல்களில் டிசைன் செய்யப்பட்டோ அல்லது ஜரிகையிலேயே டிசைன் செய்யப்பட்டோ பார்டர்களுடன் இருக்கும்.

இதில் வைர ஊசி டிசைன் பாவாடைகள், பாவாடை முழுவதும் கொடியும் பூக்களும் வருவது போல் ஜரிகைகள் நெய்து அவற்றுடன் சிறிய மற்றும் பெரிய பார்டர்கள், கான்ட்ராஸ்ட் நிறத்தில் பார்டர்கள், செல்ஃப் டிசைன் பாவாடைகள், போச்சம்பள்ளி டிசைன் பாவாடைகள், மென்பட்டுப் பாவாடைகள் இவற்றுடன் பட்டுத் தாவணியோ அல்லது கரைகளுடன் வரும் ஜ்யார்ஜெட் தாவணியோ அணியும் பொழுது அழகோ அழகு என்று சொல்லத் தோன்றுகின்றது.

இப்பொழுது திருமண வரவேற்பிற்கு மணப்பெண்கள் அணிந்து கொள்ளக்கூடிய டிசைனர் பாவாடைத் தாவணி மிகவும் பிரபலம் என்று சொல்லலாம். மணப்பெண் அணிந்து கொள்ளும் பாவாடைத் தாவணி பெரும்பாலும் பனாரஸ் பட்டு மற்றும் டிசைனர் பாவாடைகளாகவே இருக்கின்றன.

பாவாடையும், ஜாக்கெட்டும் ஒரே துணியில் தைக்கப்பட்டு அதற்கு வேறு ரகத்துணியில் தாவணி அணிவது ஒரு ஸ்டைல் என்றால் பாவாடை, தாவணி, ஜாக்கெட் மூன்றும் வேறு வேறு துணிகளில் அணிந்து கொள்வதும், ஜாக்கெட்டும் தாவணியும் ஒரே மாதிரி கலர் மற்றும் டிசைனில் இருக்க பாவாடையானது செல்ஃப் டிசைன் மற்றும் கலரில் இருப்பது போன்றும் அணிந்து கொள்கிறார்கள்.

நம்முடைய பாவாடைத் தாவணி என்பது வடக்கில் காக்ரா சோளி, சனியா சோளி லெஹங்கா என்று சிறு மாற்றங்களுடன் அணியப் படுகின்றது. பாவாடை மற்றும் ஜாக்கெட்டில் அதிகப்படியான எம்ப்ராய்டரி மற்றும் ஜர்தோஷி, குந்தன் வேலைப் பாடுகள் அதற்கு அணியும் தாவணியானது ஜ்யார்ஜெட் துணியில் எளிமையாக அணிந்து கொள்வது போல் வடிவடைக்கப்பட்டு வந்திருப்பதும் பெண்களால் பெரிதும் விரும்பப்படுகின்றது.

லினென் மற்றும் கிரேப் துணிகளிலும் பாவாடைத் தாவணி செட் வருகின்றது. ஷிஃபான் மற்றும் நெட் துணிகள், காட்டன் துணிகள், வெல்வெட் மற்றும் நெட் துணிகள், உப்பாடா பட்டு, ஷேடின் க்ரேப் மற்றும் ப்ராஸோ, நெட் மற்றும் ஜ்யார்ஜெட் துணிகள் இணைந்து வரும் பாவாடைத் தாவணி செட்டுகளும் பெண்களால் விரும்பி அணியப்படுகின்றன.

சிறுவயது குழந்தைகளுக்கு வரும் ரெடிமேட் பாவாடைத் தாவணி செட்டை அணிந்து பெண் குழந்தைகள் இங்கும் அங்கும் நடப்பதைப் பார்ப்பதற்கு அழகிய வண்ணத்துப் பூச்சி இங்கும் அங்கும் நடப்பதைப் போன்ற தோற்றத்தைத் தருகின்றது.

சிறு குழந்தைகளின் பாவாடைத் தாவணி செட் மிகவும் க்யூட்டாக இருக்கின்றது. பாவாடைத் தாவணியை செட்டாக வாங்காமல் நம் ரசனைக்கேற்ப ரன்னிங் மெட்டீரியல்கலில் எடுத்துத் தைத்துக் கொள்ளலாம்.

ரன்னிங் மெட்டீரியல்களிலேயே விலை அதிகமாக வேண்டுமானால் அது போலவும், விலை மீடியமாக வேண்டுமானால் அதற்கேற்றாற் போலவும் கிடைக்கின்றது. துணிகளைத் தைத்த பிறகு நம் ரசனைக்கேற்ப மேற்கொண்டு கை வேலைப் பாடுகளுடன் அணிந்து கொள்ளலாம். அல்லது கைவேலைப்பாடுகளை துணிகளிலே செய்த பிறகும் தைக்கக் கொடுக்கலாம்.

பாவாடைத் தாவணி என்பது பெண்களுக்கு மேலும் அழகைத் தரும் ஆடை என்று சொல்லலாம்.

=> மாலைமலர்

#இளம்பெண்கள், #பெண்கள், #பாவாடை_தாவணி,#தாவணி, #ஹாஃப்_சாரி, #தாவணி, #தாவணி_பெண்கள், #விதை2விருட்சம், #Youth_Girl, #Girl, #Half_Saree, #Pavadai_Davani, #vidhai2virutcham, #vidhaitovirutcham, #seedtotree, #seed2tree,

Leave a Reply